Në projektbuxhetin e dorëzuar këtë të martë në Kuvend, qeveria ka parashikuar një rritje të konsiderueshme të fondeve për pothuajse të gjitha institucionet e drejtësisë, duke theksuar angazhimin për forcimin e institucioneve të sistemit gjyqësor dhe atij të prokurorisë.
Një ndër rritjet më të mëdha është regjistruar për Këshillin e Lartë Gjyqësor (KLGJ), i cili do të ketë një shtesë prej 12 milionë eurosh krahasuar me vitin e kaluar, duke arritur në 68 milionë euro për vitin 2026. Kjo rritje e konsiderueshme do t’i mundësojë KLGJ-së të përmirësojë dhe optimizojë funksionimin e tij, në një periudhë kur reforma në drejtësi kërkon mbështetje të vazhdueshme.
Po ashtu, edhe Struktura e Posaçme Anti-Korrupsion (SPAK) do të përfitojë një rritje të buxhetit me 21 milionë euro, duke e çuar totalin e fondeve të saj për vitin 2026 në 39.8 milionë euro, nga 18.8 milionë euro që kishte vitin e kaluar. Ky buxhet shtesë pritet të ndihmojë në intensifikimin e hetimeve dhe procesimeve për korrupsion në nivele të larta dhe përballimin e sfidave që vijnë nga ngarkesa e lartë e punës.
Ndërkohë, Prokuroria e Përgjithshme dhe Këshilli i Lartë i Prokurorisë do të kenë një rritje të mëtejshme të fondeve, megjithatë rritja e tyre është më e vogël në krahasim me KLGJ-në dhe SPAK-un. Sidoqoftë, ky rritje pritet të ndihmojë në përmirësimin e kushteve të punës dhe në mbështetje të forcimit të kapaciteteve për ndjekjen e çështjeve të rëndësishme ligjore.
Në anën tjetër, disa institucione të tjera, si Gjykata Kushtetuese, Shkolla e Magjistraturës, Inspektori i Lartë i Drejtësisë dhe Kolegji i Posaçëm i Apelimit do të marrin më pak fonde për vitin e ardhshëm, duke pasur parasysh një ristrukturim të buxhetit dhe një optimizim të shpenzimeve për vitin 2026.
