Pas përfundimit të Asamblesë së Partia Socialiste e Shqipërisë, kryeministri Edi Rama zhvilloi këtë të diel, më 22 mars, një mbledhje me drejtuesit politikë të qarqeve në selinë qendrore të PS-së, duke vijuar me një valë të re ndryshimesh në strukturën e partisë.
Fokusi kryesor i riorganizimit duket të jetë Tirana, ku Rama ka vendosur të përforcojë ndjeshëm strukturat, duke angazhuar një numër të madh ministrash dhe figurash kyçe në njësitë administrative të kryeqytetit.
Në njësinë 1 i është shtuar edhe Mirela Kumbaro, ndërsa në njësinë 2 është emëruar Blendi Klosi. Njësia 3 do të drejtohet nga Ervin Demo.
Lëvizje të rëndësishme janë bërë edhe në njësinë 4, ku Eduard Shalsi largohet, duke u zëvendësuar nga Damian Gjiknuri, i cili ndërkohë do të angazhohet edhe në njësinë 11. Në njësinë 6 i është shtuar Belinda Balluku, ndërsa në njësinë 7 përfshihet Arbian Mazniku.
Në njësinë 8 rol kyç merr Niko Peleshi, ndërsa në njësinë 10 drejtimin politik do ta mbajë Bledar Çuçi. Njësia 11 do të ketë një ekip të përbërë nga Gjiknuri, Ervin Hoxha dhe Ulsi Manja.
Në total, PS ka shpërndarë figura të rëndësishme në të gjitha njësitë e Tiranës, duke përfshirë emra si Lindita Nikolla, Delina Ibrahimaj, Fatmir Xhafaj, Taulant Balla, Ogerta Manastirliu dhe Elisa Spiropali.
Këto zhvillime vijnë pas ndryshimeve të shpallura në Asamble, ku Rama largoi nga funksionet disa figura kryesore, mes tyre Spiropalin, Shalsin, si dhe drejtues të tjerë si Benet Beci dhe Emirjana Sako. Sipas tij, këto lëvizje synojnë forcimin e strukturave lokale dhe rritjen e efikasitetit në terren.
Në nivel qarqesh, ndryshimet kanë qenë po ashtu të thella: për Tiranën, drejtimi i është besuar Taulant Balla dhe Ogerta Manastirliu; në Durrës shkon Klosi, ndërsa në Dibër Manja. Ndërkohë, disa drejtues janë konfirmuar në detyrë, si Çuçi në Vlorë, Peleshi në Korçë, Kumbaro në Gjirokastër, Demo në Berat dhe Mazniku në Elbasan.
Riorganizimi i fundit sinjalizon një strategji të qartë të Ramës për të konsoliduar kontrollin politik në kryeqytet dhe për të përgatitur strukturat e PS për sfidat e ardhshme elektorale.
