Kryeministri Edi Rama ka reaguar ndaj deklaratës së një shoqate të re të prokurorëve, e cila mëngjesin e sotëm shprehu solidaritet me shoqatat e gjyqtarëve dhe kërkoi që të mos ketë ulje pagash.
Në reagimin e tij, Rama thekson se shoqata nuk është ende e regjistruar ligjërisht, edhe pse brenda afatit për regjistrim, dhe e cilëson të pabazë pretendimin për “ulje pagash”.
“Paska dalë edhe një shoqatë prokurorësh e re ende e paregjistruar sipas ligjit, po brenda afatit për regjistrim e cila ka deklaruar solidaritet me shoqatat e gjyqtarëve, duke kërkuar ‘që të mos ulen pagat’”, shkruan kryeministri.
Ai thekson se bëhet fjalë për një interpretim të gabuar të situatës, pasi kategoria më e privilegjuar e piramidës së pagave paraqitet si e diskriminuar. Rama sqaron se në këtë rast, “ulje page” po konsiderohet fakti që pagat nuk rriten aq sa kërkojnë shoqatat e gjyqtarëve.
“Pra, shqip, një pagë që s’më ngrihet sa ç’dua unë, është një pagë e ulur”, thekson ai, duke e quajtur këtë arsyetim të pabesueshëm, por real.
Kryeministri nënvizon gjithashtu se nuk ka pasur asnjë tentativë për uljen e pagave të gjyqtarëve apo prokurorëve dhe se qeveria ka treguar vëmendje të shtuar ndaj sistemit të drejtësisë. Ai përmend si shembull punën e nisur prej gati një viti për ndërtimin e një Poli Drejtësie, i cili pritet të ofrojë kushtet më të mira të punës në rajon.
Në fund të reagimit, Rama ngre një pyetje kritike për shoqatën e re të prokurorëve, lidhur me problematika të tjera serioze në sistemin e drejtësisë:
“Po për shqelmimin e vazhdueshëm si askund në Europë të prezumimit të pafajësisë dhe kthimin e arresteve me burg pa gjyq në një praktikë rutinë, e cila e ka njollosur Shqipërinë botërisht, a keni ndonjë gjë për të deklaruar?!”, përfundon kryeministri.
