Kryeministri Edi Rama, nga një mbledhje me deputetët dhe drejtuesit lokalë të qarkut Tiranë, ka reaguar për herë të dytë radhazi në lidhje me zhvillimet në zonën e Thethit, ku janë shembur dhjetëra ndërtime pa leje nga IKMT.
Rama hodhi poshtë zërat për ndërtime të ardhshme resortesh apo përfshirje të investitorëve të mëdhenj në këtë zonë të mbrojtur malore, duke i quajtur spekulime dhe teori për konsum politik.
“Në Shqipëri nuk ka asnjë oligark. Aty nuk bëhet fjalë që do lejohen ndërtime apo resorte. Është jashtë çdo lloj opsioni. Të gjitha teoritë lidhur me këtë operacion janë për të ardhur keq,” deklaroi ai.
Kryeministri theksoi se Thethi dhe banorët e tij nuk kanë qenë pjesë e ndërtimit të paligjshëm dhe se mbështetja për ta do të vijojë, por vetëm në rrugë institucionale.
“Thethi dhe banorët e tij nuk janë shfaqur nëpër ekrane. Ata janë një grup njerëzish që nuk kanë lidhje me këtë histori. Ne do t’i mbështesim ata që kanë prona në male, me kusht që t’i drejtohen institucioneve. Madje kemi bërë dhe ‘Paketën e maleve’,” tha Rama.
Në vijim, ai bëri të ditur se procesi i legalizimeve në vend do të përmbyllet brenda vitit 2028, por paralajmëroi prerazi se nuk do të legalizohet asnjë objekt i ndërtuar në kundërshtim me ligjin.
“Kemi marrë përsipër të mbyllim legalizimet brenda vitit 2028. Por ta harrojë kushdoqoftë që do legalizojë në shkelje të ligjit. Të gjitha ngrehinat e ngritura për qëllim fitimi do të rafshohen, nuk do të ketë asnjë tolerancë.”
Në fund, ai kërkoi që të gjithë deputetët të jenë më afër komuniteteve, duke përmendur se 83 mandatet e shumicës duhen vënë në funksion të komunikimit të drejtpërdrejtë me qytetarët.
