Ola Mitre
Rekomandimet që Kontrolli i Lartë i Shtetit le për institucionet pas shkeljeve të konstatuara në menaxhimin e financave publike janë zbatuar plotësisht vetëm në masën 33%. Sipas të dhënave nga ky dikaster për vitin 2024, në total janë zbatuar 1261 masa, nga 3882 të pranuara nga institucionet. Po ashtu, rezulton se 15% e këtyre masave janë zbatuar pjesërisht, ndërsa 22% rezultojnë në proces zbatimi. Ndërkaq, 1177 rekomandime, që përbëjnë rreth 30% të totalit kanë rezultuar të pazbatuara.
Gjatë vitit 2024, KLSH kreu verifikimin e zbatimit të rekomandimeve për 97 auditime, ndërsa ka rikërkuar nga të gjitha subjektet përshpejtimin e zbatimit të masave të pranuara, por “të pazbatuara”, si dhe të të gjitha masave që kanë rezultuar “në proces zbatimi” ose “të zbatuara pjesërisht”.
Dhënia e rekomandimeve ka për qëllim përmirësimin e situatës së subjekteve të audituara, për problematikat apo mangësitë e konstatuara, të cilat edhe gjatë vitit 2024 kanë qenë të shumta. Sipas KLSH-së, Një ndër fenomenet më të përhapura lidhet me keqklasifikimin e shpenzimeve dhe të ardhurave, çka çon në deformimin e pasqyrës financiare të institucioneve dhe cenon besueshmërinë e tyre.
Gjthashtu, KLSH vëren se mosrespektimi i kuadrit ligjor dhe rregullator, në tenderë, raportimin fiskal, zbatimin e kontratave, etj. janë problematika sistemike dhe të pranishme në disa nivele të qeverisjes. Këtu përfshihen institucione të pavarura, të qeverisjes qendrore, vetëqeverisjes vendore apo shoqëri publike me kapital shtetëror mbi 50%.
