Në Pallatin e Sportit “Farie Hoti” në Fier po vijon dita e dytë e rinumërimit të votave për zgjedhjet parlamentare, ku deri në orën 10:15 janë hapur 246 nga 587 kuti, ose rreth 42% e totalit.
Ashtu si në qarkun e Tiranës, edhe në Fier nuk priten ndryshime në renditjen përfundimtare, megjithëse janë konstatuar luhatje të vogla në numërimin e votave të partive politike.
PD humb 74 vota, PS shton 28
Nga të dhënat paraprake, Partisë Demokratike i janë zbritur 74 vota të pamerituara, ndërsa Partisë Socialiste i janë shtuar 28 vota. Këto ndryshime zbehin shpresat e kandidatit Arlind Lapaj dhe lëvizjes “Shqipëria Bëhet” për të siguruar një mandat në këtë qark.
Lapaj kërkon 519 vota shtesë për të kaluar PS-në dhe për të futur në Kuvend kandidatin Azmer Duleviç, por deri tani rezultati nuk i shkon në favor: jo vetëm që PS është forcuar, por edhe lëvizjes “Shqipëria Bëhet” i janë zbritur 4 vota.
Mandati i Çaushit forcohet, Bardho humb 39 vota
Mandati i Zegjine Çaushit ishte në pikëpyetje për shkak të diferencës së ngushtë me kandidaten Maldrita Bardhos. Por rinumërimi ka thelluar diferencën në favor të Çaushit, pasi Bardhos i janë zbritur 39 vota, ndërsa Çaushit i janë shtuar 4 vota.
Ndryshime të vogla janë regjistruar edhe për parti të tjera:
Lëvizja “Bashkë” humbet 4 vota
Koalicioni “Djathtas për Zhvillim” humbet 2 vota
Partisë “Mundësia” i shtohen 3 vota
Procesi i rinumërimit do të vijojë gjatë ditës, por sipas burimeve nga komisionerët dhe vëzhguesit në terren, asnjë parti nuk pritet të përfitojë një mandat të ri, ndërsa gabimet e zbuluara deri më tani nuk ndryshojnë ndjeshëm rezultatin përfundimtar.
