Rumania ka shpallur një emergjencë kombëtare energjetike, pas zbulimit të kontaminimit kimik në dy dërgesa të mëdha të naftës bruto të Azerbajxhanit, mes dyshimeve në rritje për një akt të koordinuar sabotimi që mund të lidhet me Rusinë.
Ministria e Energjisë lëshoi një emergjencë “të nivelit të krizës” më 4 gusht, pasi OMV Petrom, rafineria kryesore e naftës në vend, mori një dërgesë prej 92 mijë tonësh naftë bruto nga Azerbajxhani që rezultoi pozitive për klorure organike – një përbërës gërryes i njohur për dëmtimin e pajisjeve të rafinimit.
Një dërgesë e dytë me vëllim të barabartë u refuzua më pas. Nafta bruto u transportua nga porti i Ceyhanit, Turqi, nëpërmjet cisternave, duke shënuar një ndërprerje të rrallë në një korridor strategjik energjetik që lidh rajonin e Kaspikut me Evropën.
“Ky nuk është një problem tipik kontaminimi”, tha një burim i inteligjencës rumune për mediat lokale. “Duke pasur parasysh shkallën dhe kohën, ka indikacione se ky mund të jetë një operacion hibrid i projektuar për të destabilizuar infrastrukturën energjetike të Rumanisë dhe për të krijuar ndërprerje të tregut”.
Analistët e sigurisë dhe zyrtarët qeveritarë po hetojnë dyshimet se kimikatet me bazë klori mund të jenë pompuar qëllimisht në sistemin e tubacionit të naftës – një akt kompleks që kërkon akses të brendshëm dhe njohuri të specializuara. Ndërkohë që ende nuk është bërë asnjë akuzë zyrtare, agjencitë e inteligjencës dhe mediat lokale, përfshirë G4Media dhe Valahia News, kanë treguar Rusinë si një autore të mundshme.
Teoria e sabotimit mbështetet nga raportet se dërgesa të ngjashme të naftës së kontaminuar u zbuluan nga Eni i Italisë dhe grupi çek i energjisë Orlen Unipetrol, duke sugjeruar se kontaminimi mund të ketë qenë i përhapur dhe të ketë synuar disa vende të BE-së.
Për të parandaluar ndërprerjen e furnizimit vendas me karburant, qeveria rumune autorizoi lirimin e 80 mijë tonë naftë bruto dhe 30 mijë tonë naftë nga rezervat e saj strategjike. Autoritetet siguruan publikun se kjo tërheqje përfaqëson më pak se 5.5% të rezervave totale, të cilat tejkalojnë 2 milionë tonë dhe se rezervat do të rimbushen brenda 60 ditëve.
