Ambasada e Shteteve të Bashkuara në Tiranë ka përcjellë një mesazh të qartë mbështetjeje për punën e Kryeprokurorit të Posaçëm Altin Dumani, në prag të ndryshimeve në drejtimin e SPAK-ut. Përmes një deklarate zyrtare, Ambasada thekson se përballja me krimin ndërkombëtar kërkon një angazhim të përbashkët, duke nënvizuar rolin e rëndësishëm të bashkëpunimit mes SHBA-ve dhe Shqipërisë.
Sipas njoftimit, Zëvendësdrejtori për Çështjet e Europës Perëndimore Qendrore, Lyn Debevoise, zhvilloi një vizitë në SPAK për të shprehur vlerësimin e Uashingtonit për kontributin e Dumanit në luftën kundër rrjeteve kriminale dhe korrupsionit.
Ambasada thekson se përpjekjet e Kryeprokurorit të Posaçëm kanë ndihmuar në neutralizimin e strukturave të paligjshme që kërcënojnë sigurinë e Shteteve të Bashkuara, si dhe në frenimin e korrupsionit që pengon investitorët dhe kompanitë amerikane.
“Përballja me krimin ndërkombëtar kërkon një angazhim të përbashkët. Përpjekjet e z. Dumani vendosën standardin për bashkëpunim të fortë mes Shteteve të Bashkuara dhe Shqipërisë kundër organizatave kriminale ndërkombëtare, standard që shpresojmë se do të vazhdojë edhe me pasardhësin e tij,” thuhet në deklaratë.
SHBA ritheksoi se mbështetja për institucionet e drejtësisë në Shqipëri mbetet e pandryshuar dhe se partneriteti në luftën kundër krimit të organizuar do të vijojë të thellohet.
