Kryetari i Bashkisë Tiranë, Erion Veliaj, mund të mos jetë fizikisht i pranishëm në mbledhjen e Këshillit Bashkiak, ku pritet të diskutohet dhe votohet shkarkimi i tij, por ka mundësinë të përcjellë komentet e tij me shkrim. Kjo i është komunikuar vetë Veliajt nga Këshilli Bashkiak, në përgjigje të kërkesës së tij për të marrë pjesë në mbledhjen e planifikuar për të martën në orën 16:00.
“Sa më sipër, në vijim të kërkesës suaj për të qenë i pranishëm fizikisht në mbledhjen e Këshillit Bashkiak, në rast pamundësie për të qenë prezent, Ju lutem që observacionet tuaja t’i përcillni me shkrim pranë Këshillit Bashkiak, në mënyrë që ato të administrohen dhe të bëhen me dije gjatë kësaj mbledhjeje,” thuhet në reagimin zyrtar të këshillit.
Veliaj ka shpjeguar se mungesa e tij nuk vjen si pasojë e vullnetit personal, por si rezultat i një “mase sigurie” që gjykata ka vendosur ndaj tij. Sipas tij, vendimi i gjykatës nuk ka marrë parasysh rëndësinë e garantimit të qeverisjes vendore dhe ka ndërprerë në mënyrë të padrejtë një mandat kushtetues.
“Shkaktar i saj nuk është as Kryetari i Partisë Socialiste, as Partia Socialiste, as ju këshilltarë, por një vendimmarrje gjyqësore që ka ndërprerë në mënyrë të padrejtë një mandat kushtetues,” thekson Veliaj, duke nënvizuar se kjo krizë nuk mund të zgjidhet me një shkelje tjetër të Kushtetutës.
Kryetari i Bashkisë Tiranë ka kërkuar nga Këshilli që të marrë në konsideratë këto rrethana, duke theksuar rëndësinë e ruajtjes së stabilitetit të qeverisjes vendore dhe respektimin e ligjit. Ai thekson se vendimmarrjet e gjykatës nuk duhet të krijojnë precedent për ndërprerjen e mandateve të zgjedhura nga qytetarët, pasi kjo cenon funksionimin normal të institucioneve vendore dhe të drejtën e qytetarëve për përfaqësim demokratik.
Ky zhvillim vjen në një moment të tensionuar politik në kryeqytet, ku diskutohet jo vetëm e ardhmja e Veliajt në krye të Bashkisë, por edhe ndikimi që mund të ketë kjo për ekzekutivin dhe për stabilitetin politik në Tiranë. Nëse Veliaj nuk do të jetë prezent fizikisht, mesazhi i tij me shkrim do të jetë i detyrueshëm për t’u marrë në konsideratë gjatë debatit dhe votimit nga këshilltarët.
Mbledhja e Këshillit Bashkiak pritet të sjellë vendime vendimtare për të ardhmen e qeverisjes së Tiranës, ndërsa Veliaj vazhdon të argumentojë se situata e krijuar nuk është rezultat i veprimeve të tij, por i një vendimi të jashtëzakonshëm gjyqësor që, sipas tij, ka cenuar një mandat demokratik dhe kushtetues.
