Ish-kryeministri Sali Berisha ka denoncuar ashpër aferën e aeroportit të Vlorës, duke e cilësuar një ngjarje megakorruptive, ku dy ortakë privatë, Bexhet Pacolli dhe Valon Ademi, shfaqen si prestanome, ndërsa pas tyre qëndrojnë Edi Rama, ministrja Belinda Balluku dhe zyrtarë të tjerë qeveritarë.
Sipas Berishës, aeroporti i Vlorës është projektuar me korrupsion të thellë, dhe i vetmi transferim aksioni i miratuar nga qeveria ka qenë ai i kompanisë turke tek Mabco Construction, i cili është kryer në shkelje të ligjit tregtar.
“Pacolli dhe Valoni janë vetëm emra, por Edi Rama, Belinda Balluku dhe qeveritarët e tjerë janë të implikuar thellë dhe janë përgjegjës për këtë aferë,” tha Berisha. Ai shtoi se nuk ka asnjë dokument që të tregojë një transferim aksionesh midis Pacollit dhe Valonit, duke vënë në dukje se gjithë kjo është përdorur si justifikim për të fshehur përfshirjen e shtetit.
Berisha kritikoi gjithashtu koncesionin e parashikuar 35-vjeçar të aeroportit, duke theksuar se shqiptarët do të paguanin 140 milionë euro për 10 vitet e para për shërbime të paeksistuara, ndërsa fitimi total i parashikuar për kompaninë ishte rreth 700 milionë euro.
“Çdokush që i analizon këto dokumente e kupton që Pacolli dhe Valoni janë vetëm fasadë, ndërsa pas aferës qëndron qeveria shqiptare, e cila përmes firmave dhe vendimeve ka mbështetur këtë proces në mënyrë të paligjshme,” tha ish-kryeministri.
Ai përgëzoi dy ish-ministrat që refuzuan të firmosin gjobën për shqiptarët, duke e quajtur këtë një akt të guximshëm për mbrojtjen e interesit publik.
Berisha kërkoi një hetim të gjithanshëm, duke theksuar se angazhimi intensiv i qeverisë dhe zyrtarëve të lidhur me projektin tregon se kjo nuk është një përplasje private biznesi, por një aferë me përmasa të mëdha korruptive, që prek të gjithë qytetarët shqiptarë.
