Gjatë vizitës së tij në Jeruzalem, Kryeministri i Shqipërisë, Edi Rama, falënderoi Izraelin për mbështetjen e dhënë në tejkalimin e sulmit kibernetik të Iranit ndaj Shqipërisë disa vite më parë.

Rama theksoi se, si Izraeli, Shqipëria nuk ka marrëdhënie diplomatike me Iranin. Ai shtoi se bashkëpunimi mes dy vendeve po thellohet në fushat e mbrojtjes, sigurisë, sigurisë kibernetike dhe luftës kundër terrorizmit.

“Më lejoni të shpreh edhe një herë mirënjohjen tonë të thellë ndaj Izraelit për mbështetjen kritike gjatë sulmit kibernetik masiv të Iranit kundër Shqipërisë. Ashtu si Izraeli, Shqipëria nuk ka asnjë marrëdhënie diplomatike me Iranin, një vend me civilizim të jashtëzakonshëm, që është shndërruar në një ishull terri nga urrejtja e verbër kundër çdo drite. Ndërsa lutemi për shpirtrat e panumërt që kanë humbur ditët e fundit, mbajmë shpresë dhe bindje se ditët e vrasësve të Teheranit po vijnë drejt fundit”, tha Rama.

Deklarata e tij vjen ndërsa Shqipëria dhe Izraeli thellojnë bashkëpunimin në fushën e sigurisë dhe mbrojtjes kibernetike, duke forcuar edhe koordinimin në luftën kundër kërcënimeve ndërkombëtare.