Deputetja e Partisë Demokratike, Jorida Tabaku, ka shprehur shqetësimin për dështimin e ligjit të kthimit dhe kompensimit të pronave, një reformë e miratuar rreth 10 vite më parë, e cila sipas saj nuk ka përmbushur objektivat e përcaktuara.

Në një deklaratë publike, Tabaku kritikoi qeverinë për mënyrën se si është trajtuar çështja e pronave, duke theksuar se mijëra dosje vijojnë të mbeten të hapura dhe të zvarritura në proces gjyqësor, ndërsa mundësitë për kompensim fizik për ish-pronarët janë thuajse të pamundura.

Sipas deputetes demokrate, mungesa e një zgjidhjeje të drejtë dhe përfundimtare për pronësinë përbën një pengesë serioze për zhvillimin ekonomik dhe për sigurinë juridike në vend. Ajo e cilësoi reformën e pronave si një tjetër dështim të qeverisë socialiste, duke theksuar se pa respektimin e së drejtës së pronës nuk mund të ketë zhvillim të qëndrueshëm.

Tabaku kritikoi gjithashtu fondin prej 14 milionë eurosh të ndarë nga qeveria për kompensimin e pronave, duke e konsideruar atë të pamjaftueshëm përballë detyrimeve të akumuluara ndër vite. Sipas saj, kjo shumë përfaqëson “një pikë uji në oqean” krahasuar me nevojat reale të ish-pronarëve dhe vendimet gjyqësore të paekzekutuara.

Deputetja kërkoi që qeveria të rishikojë qasjen ndaj kësaj çështjeje dhe të ndërmarrë hapa konkretë për zgjidhjen përfundimtare të problemit të pronave në Shqipëri.