Komisioni i Disiplinës në burgjet shqiptare ka dënuar Ilir Metën me ndalim të aktiviteteve sportive për 10 ditë, pas një telefonate të transmetuar drejtpërdrejt në televizion nga qelia e tij.
Ish-presidenti i Shqipërisë dhe aktualisht kreu i Partisë së Lirisë, zhvilloi një bisedë telefonike me gazetaren Beti Njuma në emisionin e saj “Ora e Betit” në “Ora News”.
Telefonata, që zgjati disa minuta, u realizua me një celular që iu dha gazetares nga Tedi Blushi, numri dy i kësaj force politike.
Në fillim të telefonatës, Meta përshëndeti personalisht gazetaren, duke përmendur edhe një episod të kaluar të saj në malin e Çikës. Ai tha se po përdorte “telefonin e burgut” dhe sapo ishte kthyer nga infermieria, ku kishte kryer “matje tensioni për qejf”.
“Jam shumë mirë, si në kavalishencë. Si kavalishenca e Ministrisë së Mbrojtjes,” u shpreh Meta me ironi.
Pas publikimit të videos, autoritetet e burgut ndërhynë duke e konsideruar komunikimin një shkelje të rregullores dhe aplikuan masën disiplinore ndaj Metës, i cili ndodhet në burgun 313 në Tiranë, nën hetim për disa vepra të dyshuara penale nga Prokuroria e Posaçme (SPAK).
Hetimet ndaj tij janë zgjatur edhe me 6 muaj të tjerë, ndërsa mbetet për t’u parë nëse ky incident do të ketë pasoja të mëtejshme për të.
Ilir Meta: Përshëndetje Beti, për ju dhe Orën tuaj, Ora e Betit (emri i emisionit). I thashë, do t’i bësh shumë të fala Betit. Kur bëra Majën e Çikës herën e kaluar, Fatjoni që kishte qenë me ju më tha që këtu ka ndrydhur çik këmbën Beti, në mos gaboj.
Beti Njuma: Po ka 5 vjet ajo histori. Zoti Meta, si po e bëni telefonatën tani, lejohet apo është nga ato telefonat e burgut?.
Ilir Meta: Është telefon i burgut. Unë sa u ktheva nga Infermieria, se bëj herë pas here për qejf matje tensioni. 7 me 11, nuk lëviz këtu, është një gjendje e jashtëzakonshme. Të gjithë parametrat janë shumë lart. Jemi shumë mirë, si në kavalishencë. Si kavalishenca e Ministrisë së Mbrojtjes.
Beti Njuma: Nuk e besoj këtë
Ilir Meta: Jo jo, unë jam si në kavalishencë personalisht, jam shumë mirë.
Ish-presidenti i Shqipërisë dhe kryetari i Partisë së Lirisë, Ilir Meta ndodhet prej muajsh në qelitë e Burgut 313 në Tiranë, i arrestuar me urdhër të Prokurorisë së Posaçme, si person i dyshuar për kryerjen e disa veprave të rënda penale. Hetimet ndaj tij nuk kanë përfunduar dhe janë shtyrë me gjashtë muaj.
