Presidenti amerikan Donald Trump deklaroi se ndryshimi i regjimit në Iran do të ishte “gjëja më e mirë që mund të ndodhte”, gjatë një interviste me gazetarët.

I pyetur se kë do të preferonte të zëvendësonte udhëheqjen aktuale iraniane, Trump u përgjigj se nuk dëshiron të flasë për këtë çështje. Ai theksoi se, për të shmangur veprimet ushtarake, Tehran duhet të arrijë një marrëveshje.

“Historikisht, ata nuk e kanë bërë këtë. Do të thoja se duan të flasin, por deri më tani kanë folur shumë dhe nuk kanë vepruar”, u shpreh ai.

Ndërkohë, sipas raportimit të The New York Times, duke cituar zyrtarë në Uashington, Trump po shqyrton mundësinë e goditjes së objekteve bërthamore dhe balistike iraniane, si dhe dërgimin e ushtrisë nëse bisedimet bërthamore me Iranin dështojnë.

Për momentin, ekipi i sigurisë kombëtare e ka bindur presidentin të mos ndërhyjë, ndërsa Pentagon po forcon kapacitetet në rajon dhe mbrojtjen në njëmbëdhjetë vende që mund të jenë të ekspozuara ndaj një hakmarrjeje të mundshme iraniane, shkruan më tej gazeta.

“Presidenti Trump ka të gjitha mundësitë në tryezë në lidhje me Iranin. Ai dëgjon perspektiva të ndryshme për çdo çështje, por merr vendimin përfundimtar bazuar në atë që është më e mira për vendin tonë dhe sigurinë kombëtare”, deklaroi zëvendëssekretarja e shtypit e Shtëpisë së Bardhë, Anna Kelly.