Kryetari i Shoqatës së Avokatëve Penalistë, Saimir Visha, ka denoncuar publikisht një fenomen të pretenduar korrupsioni brenda sistemit të drejtësisë, duke akuzuar Këshillin e Lartë të Prokurorisë (KLP) dhe Këshillin e Lartë Gjyqësor (KLGJ) për pagesa të paligjshme në proceset e transferimit të gjyqtarëve dhe prokurorëve.

Në një reagim në rrjetet sociale, Visha shprehet se gjyqtarë dhe prokurorë paguajnë nga 50 deri në 100 mijë euro për t’u transferuar në qytete më të favorshme, kryesisht në Tiranë, ose në zona me ngarkesë më të ulët pune dhe përfitime ekonomike më të larta.

“Çudia është se të gjithë të transferuarit kërkojnë të gjykojnë vetëm çështje penale, sepse aty është leku, ndërsa çështjet civile apo familjare nuk ofrojnë përfitime,” shkruan Visha, duke kritikuar drejtpërdrejt KLP dhe KLGJ për krijimin e një sistemi që favorizon përfitimin personal mbi shërbimin publik.

Ai thekson gjithashtu se ky fenomen ka ndikim të drejtpërdrejtë tek qytetarët, që sipas tij, do të paguajnë në mënyrë të pashmangshme për “transfertat” e prokurorëve dhe gjyqtarëve të rinj.

Akuza vijnë në një moment kur diskutimet për transparencën dhe integritetin e institucioneve të drejtësisë në Shqipëri janë gjithmonë në fokus, dhe vlerësohet që një hetim i pavarur mund të jetë i domosdoshëm për të verifikuar pretendimet e Vishës.