Autoriteti i Konkurrencës ka njoftuar nisjen e një hetimi paraprak ndaj kompanisë One Albania SHA, duke ftuar gjithashtu qytetarët që përdorin shërbimet celulare të raportojnë çdo problem ose shqetësim që kanë për këtë treg.
Në njoftimin zyrtar thuhet se hetimi mbulon periudhën nga 1 janari 2022 deri më 25 korrik 2025, dhe ka si qëllim kryesor mbrojtjen e interesave të konsumatorëve shqiptarë. Autoriteti thekson rëndësinë e krijimit të një tregu të lirë dhe konkurrent, ku përdoruesit mund të zgjedhin shërbimin që u përshtatet më shumë, duke garantuar cilësi dhe çmime të drejta.
“A jeni përdorues i shërbimeve celulare? Kontributi juaj ka rëndësi!” – shkruhet në njoftim. Autoriteti fton qytetarët që të ndajnë ankesat, problematikat apo shqetësimet e tyre lidhur me shërbimet celulare, duke kontaktuar direkt institucionin ose në adresën e-mail: competition@caa.gov.al.
Hetimi i nisur nga Autoriteti i Konkurrencës pasqyron angazhimin e institucionit për të garantuar një treg të drejtë dhe të hapur, ku çdo kompani dhe përdorues ka të njëjtat mundësi dhe të drejta. Pjesëmarrja aktive e qytetarëve është një element kyç për identifikimin e praktikave të mundshme antikonkurruese dhe mbrojtjen e konsumatorëve.
