Debati mes aksionarëve të Aeroportit të Vlorës po intensifikohet dhe mund të shndërrohet në një çështje ligjore. Valon Ademi, përfaqësues i kompanisë 2A, që ka kryer shumicën e punimeve në aeroport, ka akuzuar publikisht Behgjet Pacollin për mashtrim.
Gazeta TemA ka kontaktuar Ademin dhe ka mësuar se konflikti lidhet me raportet e investimeve brenda koncesionit. Kompania 2A ka kryer volumin kryesor të punimeve, duke investuar 25 milion euro, krahasuar me 13 milion euro të investuara nga kompania e Pacollit. Pas kësaj ka lindur mosmarrëveshja për ristrukturimin final të aksioneve.
Në një reagim në profilin social të kompanisë 2A Group, Ademi i quan vendimet e Pacollit si “lojë të rrezikshme”.
“Ka njerëz që prej vitesh e quajnë zhvillim atë që në të vërtetë është vetëm mbulesë për mashtrim. Ato shiten si vendime, por në thelb janë një lojë e rrezikshme që nuk i reziston kohës. Ironia e madhe është se ata që kanë blerë gjithmonë besim, kujtojnë se mund ta blejnë dhe sot. Por është vetëm çështje kohe, sepse një lojë kaq e rrezikshme nuk mund të vazhdojë gjatë,” shkruan Valon Ademi.
Ky reagim rrëzon përgënjeshtrimin publik të Behgjet Pacollit dhe ngre pikëpyetje të reja mbi konfliktin brenda aksionarëve të aeroportit, duke lënë të hapur mundësinë e përplasjes ligjore.
