Vatikani ka reaguar për herë të parë pas deklaratave të Presidentit të Shteteve të Bashkuara, Donald Trump, ndaj Papa Leo XIV, duke e interpretuar gjuhën e përdorur nga lideri amerikan si një përpjekje për të imponuar narrativë politike.
Zyrtari i Vatikanit, At Antonio Spadaro, ka deklaruar në platformën X se Trump po përdor një gjuhë që synon ta vendosë debatin në një terren force dhe kontrolli, ndërsa sipas tij Papa flet një gjuhë krejt tjetër.
“Trump nuk debaton me Leon: ai i lutet atij të tërhiqet në një gjuhë që ai mund ta dominojë. Por Papa flet një gjuhë tjetër, një gjuhë që refuzon të reduktohet në gramatikën e forcës, të sigurisë dhe të interesit kombëtar,” është shprehur Spadaro.
Papa Leo XIV, i cili është Papa i parë amerikan, ka qenë gjithnjë e më i zëshëm për konfliktet ndërkombëtare, përfshirë tensionet mes SHBA-së dhe Izraelit me Iranin, duke kritikuar ashpër retorikën e kërcënimeve dhe duke i cilësuar disa prej tyre si “të papranueshme”.
Nga ana tjetër, Donald Trump ka deklaruar për mediat se nuk është dakord me qëndrimet e Papës, duke e kritikuar për qëndrime politike që sipas tij i shërbejnë së majtës radikale.
Trump ka shtuar gjithashtu se Papa është “i dobët” në çështjet e kriminalitetit dhe politikës së jashtme, duke thelluar përplasjen verbale mes tyre.
Deklaratat kanë ngjallur debat ndërkombëtar mbi kufirin mes autoritetit fetar dhe diskursit politik në skenën globale.
