Venecia është e përçarë përpara dasmës së shumëpërfolur të javës së ardhshme mes miliarderit amerikan të teknologjisë Jeff Bezos dhe Lauren Sanchez.
Disa presin me padurim shkëlqimin dhe glamurin e ngjarjes, ndërsa të tjerë kanë frikë se ajo do ta kthejë qytetin piktoresk të gondolave dhe pallateve historike në një park argëtimi.
Një grup aktivistësh ka vendosur pankarta në urën e famshme Rialto të qytetit me shkrimin “S’ka vend për Bezos!” dhe ka kërcënuar me bllokada paqësore. Ata ankohen se qyteti mesjetar dhe i periudhës së Rilindjes ka nevojë për shërbime publike dhe strehim – jo për të famshëm dhe mbi-turizëm.
Kryebashkiaku Luigi Brugnaro dhe guvernatori rajonal Luca Zaia, në anën tjetër, argumentojnë se dasma do të sjellë përfitime të mëdha ekonomike për bizneset lokale, përfshirë varkat me motor dhe gondolat që operojnë në kanalet e qytetit.
Njëmbëdhjetë vite më parë, aktori George Clooney u martua me avokaten e të drejtave të njeriut Amal Alamuddin në Venecia, duke e kthyer qytetin në një “Hollywood mbi Adriatik” me një fundjavë festimesh luksoze.
Në atë kohë, vendasit dhe turistët ishin të entuziazmuar që ishin dëshmitarë të një momenti të paharrueshëm në historinë e gjatë të qytetit për të pritur yje, veçanërisht përmes festivalit të tij të filmit – më i vjetri në botë.
Bezos, 61 vjeç, themeluesi i gjigantit të tregtisë online Amazon dhe njeriu i tretë më i pasur në botë, u fejua me gazetaren Lauren Sanchez, 55 vjeç, në vitin 2023 – katër vite pas përfundimit të martesës së tij 25-vjeçare me Mackenzie Scott.
Pas shumë spekulimeve në media për vendin ku do të zhvillohej ajo që është quajtur “dasma e shekullit”, kryebashkiaku Brugnaro konfirmoi në mars se ajo do të mbahet në Venecia – qytet që vitin e kaluar filloi të tarifojë turistët për hyrje.
Data e dasmës pritet të jetë diku mes 23 dhe 28 qershorit, me tre ditë festime elegante.
Përballë protestave të hershme nga banorët, të cilët kishin frikë se mijëra të famshëm dhe njerëz të afërt do të mbushnin qytetin, autoritetet publikuan një deklaratë ku sqaruan se dasma do të përfshijë rreth 200 të ftuar dhe nuk do të ndërhyjë në jetën e përditshme të venecianëve.
