Kryetari i Bashkisë së Vlorës, Ermal Dredha, ka shpallur një listë të gjerë vakancash në disa prej drejtorive dhe ndërmarrjeve vartëse, pas dorëheqjes së disa prej drejtuesve aktualë. Lajmi u bë i ditur përmes një postimi në profilin e tij zyrtar në Facebook, ku ai u bëri thirrje qytetarëve dhe profesionistëve të interesuar që të aplikojnë për pozicionet e hapura.

“Vakancat janë të hapura për të gjithë ata që besojnë se kanë përvojën, gatishmërinë dhe përgjegjshmërinë për të kontribuar dhe për t’i shërbyer zhvillimit të qytetit në të gjitha nivelet”, shkruan Dredha.

Në faqen zyrtare të Bashkisë Vlorë janë publikuar tashmë procedurat për një pjesë të këtyre pozicioneve, ndërsa pjesa tjetër do të bëhet publike në ditët në vijim.

Pozicionet e shpallura aktualisht janë:

Drejtor në Drejtorinë e Projekteve të Huaja, Integrimit Europian dhe Diasporës

Drejtor në Drejtorinë e Auditimit të Brendshëm

Drejtor në Drejtorinë e Protokoll-Arkivës

Kryeinspektor në IMT (Inspektoriatin e Mbrojtjes së Territorit)

Drejtor në Policinë Bashkiake

Drejtor në Ndërmarrjen e Shërbimeve Publike

Drejtor në Ndërmarrjen e Gjelbërimit

Drejtor në Ndërmarrjen e Pastrimit

Drejtor në Drejtorinë e Mbrojtjes Civile

Drejtor në Qendrën Kulturore të Fëmijëve

Drejtor në Shtëpinë e Foshnjes

Drejtor në Teatrin “Petro Marko”

Dredha ka sqaruar se aplikimet duhet të dorëzohen brenda afateve të përcaktuara në çdo shpallje zyrtare, ndërsa ka theksuar se procesi është pjesë e një përpjekjeje për ristrukturim dhe përmirësim të administratës vendore.

Kjo lëvizje vjen pas një sërë dorëheqjesh të papritura në drejtoritë kryesore, që duket se kanë nxitur nisjen e një procesi të ri për përzgjedhjen e drejtuesve të rinj.