Projektbuxheti i vitit 2026 shënon një ndryshim thelbësor në qasjen ndaj pushtetit vendor, duke e pozicionuar atë si një aktor kryesor në zhvillimin ekonomik, social dhe institucional të vendit. Gjatë prezantimit në Kuvend, Ministri i Shtetit për Pushtetin Vendor, Ervin Demo, theksoi se mbështetja prej 1.2 miliardë euro, ose 3.52% të PBB-së, për bashkitë është më e larta e dhënë ndonjëherë në historinë e financave publike në Shqipëri.

“Viti 2026 është viti ku pushteti vendor trajtohet si aktor real zhvillimi dhe jo si strukturë periferike. Kjo mbështetje nuk është vetëm financiare, por edhe institucionale dhe teknologjike”, deklaroi ministri Demo nga foltorja e Kuvendit.

Sipas tij, transfertat totale në mbështetje të bashkive arrijnë në 47.3 miliardë lekë, ku përfshihen transferta e pakushtëzuar, ajo sektoriale, rritja e pagave për administratën vendore dhe granti i performancës, i cili shpërblen bashkitë që tregojnë transparencë, eficiencë dhe rezultate të matshme.

Një risi e këtij projektbuxheti është fakti se investimet vendore arrijnë për herë të parë në 1% të PBB-së, duke krijuar mundësi për projekte konkrete në infrastrukturë, shërbime sociale, gjelbërim, ndriçim publik, qendra komunitare dhe modernizim të shërbimeve për qytetarët.

Në mbyllje të fjalës, Demo nënvizoi se ky buxhet synon të përkthehet në përmirësim real të qeverisjes vendore:
“Ky buxhet nuk është thjesht një listë shifrash, por një angazhim politik për qeverisje moderne, transparente dhe europiane.”