Ish-kryeministri Sali Berisha akuzon qeverinë për keqpërdorim të fondeve publike të inceneratorit të Tiranës, duke thënë se rreth 190 milionë euro po përdoren për ndërtimin e kullave nga kryeministri Edi Rama dhe kryebashkiaku Erion Veliaj.

Berisha shtoi se hetimi për këtë aferë është bllokuar dhe SPAK, nën drejtimin e Altin Troplinit, nuk po kryen veprime për zbardhjen e së vërtetës. Ai paralajmëroi se çdo përpjekje për të fshehur këto dëshmi do të ketë pasoja ligjore, duke i ngarkuar me përgjegjësi ata që duan të mbulojnë skandalin.

“Qytetarët kanë denoncuar se paratë e inceneratorit janë përdorur për interesa personale dhe ndërtimin e kulla luksoze, ndërsa drejtësia hesht,” tha Berisha.

Sipas tij, 130 milionë eurot e inceneratorit i shtohen edhe 60 milionë të tjera nga investime të dyshimta, duke arritur në 190 milionë euro fonde publike të shpenzuara në mënyrë të dyshimtë.

Berisha i kërkon SPAK dhe institucioneve të tjera të zbardhin menjëherë këto abuzime dhe të mos mbajnë heshtje përballë kësaj situate.