Jeffrey Epstein, miliarderi amerikan i dënuar për krime seksuale, ka qenë i përfshirë në bisedime për blerjen e ishullit grek Scorpio, ish-pronë e Aristotel Onassisit, sipas dokumenteve të publikuara së fundmi nga Departamenti i Drejtësisë i Shteteve të Bashkuara.
Kontaktet, të zhvilluara nga gushti deri në fund të vitit 2011, tregojnë se Epstein po mblidhte informacione të detajuara mbi ishullin, megjithatë bisedimet nuk çuan në një marrëveshje konkrete. Dokumentet nuk sqarojnë nëse ai kishte interes personal për blerjen apo po vepronte në emër të një pale të tretë.
Të dhënat janë pjesë e rreth 3 milionë dokumenteve dhe email-eve të deklasifikuara nga autoritetet amerikane. Materialet që lidhen me ishullin Scorpio janë publikuar pa censurë, me përjashtim të adresave elektronike të bashkëbiseduesve të Epstein.
Kontaktet dhe interesimi për ishullin
Sipas korrespondencës, Epstein komunikonte për këtë çështje me Boris Nikoliç, ish-bashkëpunëtor i Bill Gates, si dhe me Richard Giraud, një sipërmarrës francez i përfshirë në tregun e pasurive të paluajtshme luksoze.
Më 5 gusht 2011, Giraud i dërgoi Nikoliç informacion mbi disa ishuj privatë në Greqi. Një ditë më pas, Nikoliç ia përcolli të dhënat Epstein-it, duke e përshkruar Scorpio-n si “një nga ishujt më privatë në Greqi”.
Në ditët në vijim, Epstein kërkoi informacione shtesë, përfshirë statusin e vijës bregdetare dhe nivelin e privatësisë. Nikoliç e informoi se ishulli nuk ishte zyrtarisht në shitje, por premtoi të verifikonte më tej detajet.
Më 17 gusht 2011, Nikoliç konfirmoi se Scorpio ishte plotësisht privat, duke përshkruar rezidencat, pistën e helikopterëve dhe historinë e ishullit, përfshirë lidhjen e tij me Aristotel Onassisin dhe Jackie Kennedy.
Bisedime pa rezultat
Nga data 20 gusht, nisi një shkëmbim i drejtpërdrejtë mes Epstein-it dhe Giraud-it, me këtë të fundit që po përpiqej të siguronte një vizitë private në ishull. Emailet tregojnë se Epstein ndodhej me pushime në Evropë dhe kishte pyetje të vazhdueshme mbi aksesin dhe privatësinë.
“Nuk ka ishull plotësisht privat”, shkruante Giraud në një nga mesazhet, duke sqaruar më pas se Scorpio është pronë private dhe hyrja nuk lejohet pa autorizim.
Në fillim të shtatorit 2011, u diskutua mundësia e një vizite në tetor, por Epstein, i cili ndodhej në Nju Jork, deklaroi se nuk mund të udhëtonte. Edhe përpjekjet e mëvonshme për planifikim, përfshirë komunikime të tjera në nëntor dhe në fund të vitit 2011, nuk u konkretizuan.
Sipas dokumenteve të publikuara, interesimi i Epstein-it për ishullin Scorpio mbeti në nivel bisedimesh dhe eksplorimi, pa u shndërruar në një marrëveshje apo vizitë zyrtare.
