Ndërsa vendet evropiane po rrisin shpenzimet për mbrojtjen, një çështje kyçe mbetet e pazgjidhur: mënyra e lëvizjes së pajisjeve dhe trupave ushtarake nga një vend në tjetrin në rast konflikti.

Ideja e një “Shengeni ushtarak” parashikon krijimin e një zone ku armët dhe trupat mund të lëvizin brenda bllokut po aq lehtë sa qytetarët brenda zonës Shengen, pa nevojën për pasaporta. Ky koncept është diskutuar prej vitesh, por deri tani nuk ka marrë zbatim, as nga Bashkimi Evropian dhe as nga NATO, edhe pse lufta në Ukrainë ka rritur urgjencën për lëvizshmëri më të madhe ushtarake.

Më 19 nëntor, Komisioni Evropian pritet të prezantojë përpjekjen më të fundit për të realizuar këtë projekt deri në fund të dekadës.

NATO-ja ka shpresuar prej kohësh që BE-ja do të forcojë fuqinë ligjvënëse dhe të alokojë më shumë fonde për lëvizshmërinë ushtarake, veçanërisht tani që 23 nga 27 shtetet anëtare të BE-së janë gjithashtu pjesë e aleancës ushtarake. Konflikti në Ukrainë ka theksuar nevojën urgjente për të intensifikuar të gjitha çështjet e mbrojtjes dhe koordinimit ushtarak ndërmjet vendeve evropiane.