Një raport i Ministrisë së Mbrojtjes së Italisë, i përgatitur nga Guido Crosetto, ngre alarmin për një kërcënim serioz që Rusia po ushtron ndaj Europës përmes “luftës hibride”.

Dokumenti, që qarkullon në tryezën e presidentit italian Mattarella dhe tek udhëheqës të tjerë europianë, paralajmëron se Kremlini po përdor mjete të ndryshme, nga sulmet kibernetike dhe dezinformimi, te presioni ekonomik, me synimin për të dobësuar Perëndimin dhe për të destabilizuar vendet europiane.

Qëllimi kryesor, sipas raportit, është ndikimi në politikë dhe shoqëri përmes fushatave dezinformuese dhe lajmeve të rreme, të afta të ndryshojnë qëndrimet e opinionit publik.

Europa rezulton veçanërisht e ekspozuar në tre fusha kryesore: energjia, infrastruktura kritike dhe ekosistemi politik e social. Në listën e rreziqeve përmenden portet, aeroportet, rrjetet dhe sistemet e komunikimit, të cilat mund të bëhen objekt sulmesh, përfshirë edhe përdorimin e dronëve, një problem që tashmë është vërejtur në disa vende të Veriut të kontinentit.

Raporti thekson se viti 2024 shënoi një rritje të dukshme të aktiviteteve hibride ruse, në fusha si teknologjia, diplomacia, ekonomia, kibernetika dhe ushtria. Llogaritjet tregojnë se një pjesë e konsiderueshme e sulmeve është drejtuar ndaj vendeve europiane, me akte sabotimi, zjarrvënie pranë zonave strategjike dhe fushata të koordinuara dezinformimi.

Për t’u mbrojtur, dokumenti propozon krijimin e një qendre të posaçme europiane për luftën hibride, si edhe ngritjen e një strukture të avancuar për mbrojtjen kibernetike, që do të angazhonte ekspertë në nivel shtetëror.

Në përfundim, raporti thekson se Europa duhet të jetë e përgatitur për një formë lufte moderne që nuk zhvillohet në fushëbetejë, por përmes manipulimit të informacionit, sulmeve digjitale dhe presioneve ekonomike, të cilat synojnë të minojnë stabilitetin dhe unitetin europian.