Shtetet e Bashkuara dhe Kina kanë arritur një marrëveshje për shitjen e degës amerikane të TikTok një konsorciumi investitorësh kryesisht amerikanë, të udhëhequr nga Oracle dhe Silver Lake. Lajmi është raportuar nga portali Semafor, duke cituar burime të njohura me çështjen, ndërsa marrëveshja pritet të finalizohet brenda kësaj jave.

Sipas marrëveshjes, kompania kineze ByteDance do të mbajë vetëm 20% të aksioneve në TikTok US. Ndërkohë, Oracle, Silver Lake dhe MGX (me seli në Emiratet e Bashkuara Arabe) do të zotërojnë secila nga 15% të aksioneve. Në konsorcium përfshihen gjithashtu investitorë të tjerë të mëdhenj, si Susquehanna, Dragoneer, DFO, si dhe zyra familjare e kryetarit të Dell, Michael Dell.

Data 22 janar është caktuar si afati përfundimtar për mbylljen e shitjes së degës amerikane të TikTok tek grupi i investitorëve amerikanë. Sipas mediave kineze, ndërmarrja e re e përbashkët do të jetë përgjegjëse për mbrojtjen e të dhënave të përdoruesve dhe moderimin e përmbajtjes në platformë, çështje që kanë qenë në qendër të debateve politike dhe të sigurisë kombëtare në SHBA.

Sipas të dhënave të firmës analitike Sensor Tower, TikTok ka qenë aplikacioni më i shkarkuar në Shtetet e Bashkuara gjatë viteve 2021 dhe 2022. Aktualisht, platforma përdoret nga rreth 170 milionë amerikanë, që përbëjnë afërsisht gjysmën e popullsisë së vendit.