Mbretëria e Bashkuar ka njoftuar se nuk do të nënshkruajë traktatin e quajtur “Bordi i Paqes”, të propozuar nga Presidenti amerikan Donald Trump, për shkak të shqetësimeve lidhur me përfshirjen e Rusisë. Lajmin e bëri të ditur sekretarja britanike e Jashtme, Yvette Cooper, gjatë një interviste për BBC nga Forumi Ekonomik Botëror në Davos, Zvicër.

Cooper theksoi se Britania mbështet planin 20-pikësh të Trump për Gazën dhe dëshiron të luajë një rol në fazën e dytë të procesit të paqes në rajon. Megjithatë, ajo bëri të qartë se Mbretëria e Bashkuar nuk do të jetë pjesë e “Board of Peace” në këtë fazë.

“Ka shumë punë për t’u bërë. Ne nuk do të jemi nënshkrues sot, sepse bëhet fjalë për një traktat ligjor që ngre çështje më të gjera, dhe gjithashtu kemi shqetësime për përfshirjen e Putinit, që flet për paqe, ndërkohë që nuk kemi parë ende ndonjë shenjë se ai është i përkushtuar ndaj paqes në Ukrainë”, deklaroi Cooper.

Sipas saj, vendimi britanik reflekton një qasje të kujdesshme ndaj marrëveshjeve ndërkombëtare dhe rolin aktiv të Mbretërisë së Bashkuar në proceset e paqes, duke ruajtur gjithashtu fokusin mbi situatën aktuale në Ukrainë dhe angazhimin e Rusisë në këtë konflikt.