Struktura e Posaçme Kundër Korrupsionit dhe Krimit të Organizuar (SPAK) ka dhënë pretencën për njërën nga çështjet më të bujshme të viteve të fundit – dosjen e njohur si “Metamorfoza”.

SPAK ka kërkuar 13 vite burg për ish-shefin e Krimeve në Policinë e Shtetit, Dedan Gjoni, i akuzuar për përfshirje në veprimtari të paligjshme që bien ndesh me detyrën dhe rolin e tij si oficer i lartë i rendit.

Sipas procedurave ligjore, Gjoni ka përfituar nga gjykimi i shkurtuar, çka i jep të drejtën për ulje me 1/3 të dënimit në rast shpalljeje fajtor nga gjykata. Kjo do të thotë se dënimi i tij përfundimtar pritet të jetë 8 vite e 4 muaj burg.

Dosja “Metamorfoza” përfshin hetime të gjera që zbuluan rrjete të organizuara dhe bashkëpunime të paligjshme mes individëve në sistemin e drejtësisë, rendit dhe grupeve kriminale, duke tronditur besimin e opinionit publik në institucionet ligjzbatuese.

Gjykimi për të pandehurit në këtë dosje është ende në vijim, ndërsa priten edhe vendimet për personat e tjerë të përfshirë.