Emri i pedagogut dhe analistit Ermal Hasimja është një nga tre kandidaturat që po shqyrtohen nga opozita për garën në Bashkinë e Tiranës, ku përballë do të jetë ministrja Ogerta Manastirliu.

Përkrah tij, në tryezën e negociatorëve të Partisë Demokratike dhe opozitës janë propozuar edhe emrat e Florian Hackajt dhe Edlira Cepanit.

Pas publikimit të emrit të tij si kandidat potencial, Hasimja ka reaguar publikisht duke u shprehur se ndihet i vlerësuar për këtë propozim, por se një vendim përfundimtar do ta marrë vetëm në rast të një propozimi zyrtar nga opozita.

“Ndihem padyshim i vlerësuar që emri im është propozuar në listën e kandidatëve potencialë të opozitës për Tiranën dhe falenderoj ata që e kanë propozuar apo mbështetur idenë. Kur të marr (nëse marr) një propozim zyrtar do të mund të mendohem dhe të marr një vendim”, – u shpreh Hasimja.

Ai shtoi se e vlerëson faktin që në listë janë edhe dy emra të tjerë të njohur, Florian Hackaj dhe Edlira Cepani, të cilët sipas tij do të ishin kandidatë të denjë për opozitën.