Sekretari i Përgjithshëm i Partisë Demokratike, Flamur Noka, ka reaguar ashpër pas vendimit të Gjykatës së Tiranës për lirimin e katër protestuesve të arrestuar gjatë protestës së opozitës më 22 dhjetor para Kryeministrisë.

Gjykata vendosi lirimin e protestuesve, duke caktuar ndaj tyre masën e sigurisë “detyrim paraqitje”. Pas këtij vendimi, Noka doli në një prononcim për mediat, ku kritikoi fort veprimet e Policisë së Shtetit gjatë protestës, duke i cilësuar ato si të papranueshme dhe të dhunshme ndaj qytetarëve.

Sipas Nokës, sjellja e policisë ndaj protestuesve ka qenë e ngjashme me “sjellje bande”, ndërsa theksoi se qytetarët kishin dalë për të protestuar kundër asaj që ai e quajti lidhje të qeverisë me krimin e organizuar. Ai akuzoi autoritetet se po përdorin forcën për të frikësuar opozitën dhe qytetarët kritikë ndaj qeverisë.

“Policia e Ilir Prodës sillet si bandë me qytetarët. Këta qytetarë kanë dalë për të protestuar kundër Gys Agasit dhe karteleve, ndërkohë që në qelitë e komisariateve akuzohen si destabilizues. Realiteti është se Rama dhe bandat e tij po bëjnë gjithçka për të destabilizuar vendin”, u shpreh Noka.

Ai shtoi gjithashtu se, ndërkohë që protestuesit po përballeshin me arrestime dhe procedime penale, persona të cilët opozita i akuzon për lidhje me pushtetin, sipas tij, vijonin të lëviznin lirshëm dhe nën mbrojtje. “Ndërkohë që qytetarët protestonin, Gysi ishte me makinë në eskortën e kryeministrit”, deklaroi Noka.

Protesta e 22 dhjetorit u shoqërua me tensione mes protestuesve dhe forcave të rendit, ku pati edhe incidente. Opozita ka paralajmëruar vijimin e aksioneve protestuese, duke e konsideruar reagimin e policisë dhe arrestimet si përpjekje për të shtypur zërin e qytetarëve kundër qeverisë.