Kryeministri Edi Rama, duke folur nga seanca plenare e Kuvendit për buxhetin dhe paketën fiskale, njoftoi se biznesi i vogël në Shqipëri nuk do të paguajë tatim fitimi deri në vitin 2029, duke e vendosur vendin në nivelin më të lartë të biznesit pa TVSH në Evropë.
Rama gjithashtu deklaroi se objektivi i tij për fundin e mandatit është që paga minimale të arrijë 700 euro, ndërsa prezantoi iniciativën e quajtur “Paça Fiskale”, që parashikon një falje të gjerë të detyrimeve tatimore për sipërmarrjet.
Sipas kryeministrit, falja e detyrimeve do të realizohet në katër forma:
Fshirja e plotë e detyrimeve të papaguara për periudha më të vjetra se 10 vite.
Fshirja e 50% e detyrimeve për periudhën 5–10 vite, me kusht që pjesa e mbetur të paguhet menjëherë.
Fshirja e 25% e detyrimeve për periudhën 5–10 vite, nëse pjesa e mbetur paguhet me këste brenda vitit.
Fshirja e gjobave dhe kamatëvonesave për periudhën 1–5 vite, me kusht që të paguhet tatimi dhe kontributi i asaj periudhe.
Rama theksoi se të gjitha këto përfitime do të përfshijnë gjithashtu fshirjen e gjobave dhe kamatëvonesave, ndërsa sipërmarrësit do të kenë mundësinë të korrigjojnë deklarimet e mëparshme në pasqyrat financiare.
“Sipërmarrjet mund të angazhohen për të rritur fitimin e tatueshëm me 18% krahasuar me vitin e kaluar, dhe ky fitim do të taksohet vetëm 5%. Kjo është një marrëveshje e re, kuptimplotë dhe transparente,” tha kryeministri.
Rritja e pagave dhe indeksimi i administratës publike
Rama foli gjithashtu për përparimin e pagave:
Paga minimale ka pësuar rritje të vazhdueshme: nga 157 euro kur mori detyrën, në 500 euro aktualisht.
Pesha e të punësuarve me pagë minimale ka rënë nga 60% në 14%, duke treguar një rritje të vazhdueshme drejt pagave më të larta.
Paga mesatare në sektorin privat është dyfishuar, ndërsa paga mesatare në sektorin publik ka arritur 1000 euro.
Për herë të parë do të futet indeksimi periodik i pagave për administratën publike, për të mbështetur familjet dhe rritjen e standardeve të jetesës.
Buxheti parashikon gjithashtu rritje të diferencuar të pagave më të ulëta.
Rama theksoi gjithashtu rëndësinë e përjashtimit gradual nga tatimi mbi pagën minimale, duke nisur me ata që fitonin 300 euro, më pas 400 euro dhe tani për ata që do të kenë pagë 500 euro.
