Deputeti i Partisë Demokratike, Belind Këlliçi, ka akuzuar kryeministrin Edi Rama se për 12 vite qeverisje ka ndërtuar një model të bazuar tek korrupsioni dhe shpërdorimi i fondeve publike, duke sjellë si shembull aferën e inceneratorëve.

Në një deklaratë për media, Këlliçi tha se projektet në Elbasan, Fier, Vlorë dhe Tiranë kanë dështuar plotësisht dhe janë kthyer në “monumente korrupsioni”. Ai theksoi se asnjë prej tyre nuk funksionon sipas kontratave, ndërsa qindra milionë euro të taksave të qytetarëve janë zhdukur.

“Inceneratori i Elbasanit nuk trajton mbetjet, landfilli merr flakë çdo gjashtë muaj. Në Fier, dhjetëra milionë euro kanë prodhuar vetëm një pirg betoni. Në Vlorë, 10 milionë euro u hodhën për një projekt që ka kthyer qytetin në tym kancerogjen. Ndërsa në Tiranë janë paguar mbi 170 milionë euro për një incenerator fantazmë, që nuk ekziston,” tha Këlliçi.

Sipas tij, SPAK ka ndëshkuar vetëm zyrtarë të nivelit të ulët, ndërsa përgjegjësit kryesorë, Edi Rama dhe Erion Veliaj, vijojnë të mbeten të paprekur.

Deputeti demokrat e cilësoi shpalljen e riciklimit si strategji të re nga qeveria, jo si vizion, por si pranim të dështimit të inceneratorëve. Ai paralajmëroi se edhe krijimi i një operatori kombëtar për mbetjet do të jetë një “gropë e re korrupsioni”.

“E vërteta është një dhe vetëm një: projekti i inceneratorëve është vjedhja e shekullit, ndërsa ‘riciklimi’ i Ramës është thjesht afera korruptive e radhës,” u shpreh Këlliçi.