Akuzat për përfshirje të ish-presidentit venezuelian Nicolas Maduro në trafikun ndërkombëtar të drogës, të ngritura nga presidenti amerikan Donald Trump, janë pritur me skepticizëm si në Evropë ashtu edhe në Shtetet e Bashkuara. Kritikët i kanë cilësuar ato si të ekzagjeruara ose si një justifikim politik për ndërhyrjen që çoi në arrestimin e tij.
Megjithatë, sipas revistës amerikane Newsweek, dosja penale ndaj Maduro-s dhe bashkëshortes së tij rezulton më e fortë nga sa është menduar fillimisht. Publikimi sugjeron se autoritetet amerikane mund të kenë siguruar një “superdëshmitar” kyç, i cili pritet të luajë rol vendimtar në procesin gjyqësor.
Bëhet fjalë për Hugo Armando Carvajal Barrios, ish-drejtor i inteligjencës ushtarake të Venezuelës dhe një nga njerëzit më të besuar të Hugo Chávez-it. I njohur me nofkën “El Pollo”, Carvajal u distancua nga regjimi i Maduro-s në vitin 2019, u arratis në Spanjë dhe më pas u arrestua nga autoritetet spanjolle, për t’u ekstraduar në SHBA.
Në qershor, Carvajal u deklarua fajtor për akuza të rënda që lidhen me trafik ndërkombëtar droge, vepra penale që parashikojnë dënim deri në burgim të përjetshëm. Prokuroria amerikane ka konfirmuar arritjen e një marrëveshjeje bashkëpunimi me të, ndërsa shpallja e dënimit është shtyrë.
Sipas Newsweek, kjo shtyrje është një tregues i qartë se Carvajal pritet të dëshmojë kundër ish-presidentit venezuelian në një gjykatë federale në New York. Ish-zëvendësprokurori amerikan Elie Honig e ka cilësuar këtë praktikë si të zakonshme në çështjet që lidhen me kartelet e drogës dhe krimin e organizuar.
Emri i Carvajal-it përmendet edhe në aktakuzat zyrtare si bashkëpunëtor i drejtpërdrejtë në të ashtuquajturin Karteli “Los Soles”, grup i akuzuar për trafik droge në bashkëpunim me nivelet më të larta të ushtrisë venezueliane.
Burime amerikane nuk përjashtojnë mundësinë që Carvajal t’u ketë dhënë autoriteteve të SHBA-së informacione të detajuara mbi lëvizjet dhe zakonet e Maduro-s, duke ndihmuar CIA-n dhe forcat speciale Delta Force në lokalizimin dhe arrestimin e tij gjatë operacionit të zhvilluar së fundmi.
Procesi ndaj Maduro-s pritet të jetë një nga çështjet më të bujshme gjyqësore ndërkombëtare të viteve të fundit, me pasoja të rëndësishme politike dhe diplomatike.
