Deputetja e Partisë Demokratike, Jorida Tabaku, ka kritikuar propozimin e fundit të qeverisë për “shqyrtimin e investimeve të huaja”, duke e cilësuar atë të vonuar, të pjesshëm dhe larg standardeve euroatlantike. Ajo theksoi se kërkesa për një mekanizëm real dhe funksional të screening-ut të investimeve të huaja është bërë prej kohësh nga partnerët strategjikë të Shqipërisë, si SHBA dhe BE, por propozimi i qeverisë nuk adreson rreziqet reale.

Tabaku shtoi se shqyrtimi serioz i investimeve nuk është formalitet, por një domosdoshmëri për sigurinë kombëtare, mbrojtjen e të dhënave dhe orientimin strategjik të vendit, duke përmendur edhe abuzime me të dhëna personale dhe skandale në institucione kyçe.

Sipas saj, Shqipëria është në një udhëkryq historik: ose ndjek rrugën euroatlantike me transparencë dhe investime nga vende mike, ose rrezikon marrëveshje të errëta pa garanci sigurie. Tabaku theksoi se propozimi i qeverisë është i kufizuar vetëm në sektorin e medias dhe lë jashtë sektorë jetikë si infrastruktura portuale, teknologjia e informacionit, sistemet kritike softuerike dhe industria e mbrojtjes.

Në përfundim, ajo deklaroi se Shqipëria ka nevojë për një legjislacion të fortë dhe në përputhje me standardet e BE-së, dhe riafirmoi angazhimin e opozitës për të mbështetur një kuadër ligjor gjithëpërfshirës që mbron interesin publik, sigurinë kombëtare dhe të ardhmen europiane të vendit.