Këshilli i Lartë i Prokurorisë (KLP) ka shmangur për dy mbledhje radhazi, më 11 dhe 16 korrik, shqyrtimin e kërkesës së prokurores së Shkodrës, Elsa Gjeli, për mbrojtje ndaj akuzave të kryeministrit Edi Rama. Gjeli kërkoi mbrojtje lidhur me mosfillimin e hetimit për kallëzimin për ndërtimet në Theth, por kjo çështje nuk u fut në axhendën e KLP-së as për mbledhjen e paralajmëruar më 25 korrik.

Ministri i Drejtësisë, Ulsi Manja, reagoi duke kërkuar nisjen e një procedimi disiplinor ndaj Gjelit, çka po përdoret nga KLP si argument për të mos marrë një qëndrim deri në përfundimin e hetimeve.

Kryetarja e KLP-së, Mirela Bogdani, tha se anëtarët nuk mund të komentojnë për një çështje që mund të bëhet objekt i procedimit disiplinor, ndërsa Inspektoriati i Lartë i Drejtësisë (ILD) ende nuk ka njoftuar nisjen e hetimeve ndaj prokurores.

Elsa Gjeli nuk ka komentuar për këtë mosveprim të KLP-së.