Gjykata e Posaçme kundër Korrupsionit ka vendosur që Komisioni i Ankimit dhe Sanksioneve (KAS) të hetohet penalisht për shpërdorim detyre, pas kallëzimit të kandidatit demokrat Aulon Kalaja lidhur me rezultatin e zgjedhjeve të 11 majit.
Gjyqtarja Etleva Deda ka rrëzuar vendimin e prokurorit të SPAK, Sotir Kllapi, i cili kishte kërkuar mosfillimin e hetimeve. Me këtë vendim, GJKKO i urdhëron SPAK-ut regjistrimin e procedimit penal dhe nisjen e hetimit ndaj 5 anëtarëve të KAS për dyshimet e shpërdorimit të detyrës gjatë procesit të ankimit zgjedhor.
Pas seancës, Aulon Kalaja deklaroi para mediave se rezultati i zgjedhjeve të 11 majit është falsifikuar dhe se vendimi i gjykatës vërteton shkeljet e pretenduara.
“Gjykata konstaton se KAS duhet të rinumëronte të gjitha kutitë. KAS, sipas gjykatës, ka shkelur ligjin duke miratuar një tabelë përmbledhëse të falsifikuar, sepse në 300 e ca kutitë e tjera të pa rinumëruar ka pasur vota të falsifikuara,” – u shpreh Kalaja.
Vendimi i GJKKO-së pritet të hapë një proces të ri hetimor mbi veprimet e KAS dhe mënyrën si është administruar ankimi zgjedhor.
