Drejtuesja Politike e PD në rrethin e Sarandës, Ina Zhupa ka denoncuar se zyra elektorale e PS në Delvinë shkel ligjin elektoral.

Sipas Zhupës, zyra elektorale e PS është ngritur rreth 50 metra larg nga KZAZ në një kohë që sipas legjislacionit, parashikohet që kjo largësi të jetë minimumi 300 metra.

Ajo i ka kërkuar Komisionerit Shtetëror që të marrë masat për mbylljen e kësaj zyre elektorale.

Postimi i plotë:
Ndodhem në qytetin e Delvinës, këtu janë ambientet e KZAZ-së për Bashkinë e Delvinës.
Sipas legjislacionit zgjedhor çdo zyrë elektorale do të duhet të ketë një distancë të paktën 300 metra larg KZAZ-së dhe larg qendrave të votimit.
Në këtë ambient do të jetë KZAZ-ja siç është aktualisht, dhe do të jenë edhe 2 qendra votimi në ditën e zgjedhjeve.
Partia Socialiste, kandidatët e saj të listës së hapur, kanë shkelur legjislacionin zgjedhor dhe udhëzimin e Komisionerit Shtetëror të Zgjedhjeve duke hapur një zyrë elektorale jo më pak se 50 metra larg KZAZ-së.
Pra sapo zbret shkallët e KZAZ-së t`i ke propagandën e Partisë Socialiste që pret votuesit ditën e zgjedhjeve apo administratën zgjedhore gjatë punës së tyre në KZAZ.
Kjo është e ndaluar nga ligji dhe i kërkojmë Komisionerit Shtetëror që menjëherë të marrë masat për mbylljen e kësaj zyre elektorale në qytetin e Delvinës.