Kryeministri izraelit Benjamin Netanyahu mbajti një fjalim të zjarrtë në seancën e 80-të të Asamblesë së Përgjithshme të Kombeve të Bashkuara, duke shkaktuar largimin demonstrativ të disa delegacioneve në shenjë proteste.

Fjalimi i tij erdhi në një moment kur gjithnjë e më shumë shtete perëndimore, përfshirë aleatë të ngushtë të SHBA-së si Franca dhe Kanadaja, kanë nisur ta njohin zyrtarisht shtetin palestinez.

Në podium, Netanyahu tërhoqi vëmendje të madhe duke mbajtur në xhaketë një QR-kod, i cili të çonte në një faqe interneti me pamje nga sulmet e Hamasit ndaj Izraelit më 7 tetor 2023. Në faqen e publikuar thuhej:

“Krimet kundër njerëzimit të kryera nga Hamasi janë fakte, të mbështetura nga prova. Mos bini pre e dezinformimit dhe manipulimeve mediatike të Hamasit.”

Fjalimi i tij u transmetua gjithashtu në rrjetet celulare brenda Gazës, duke iu drejtuar drejtpërdrejt edhe palestinezëve.

Netanyahu kritikoi ashpër liderët botërorë që mbështesin krijimin e një shteti palestinez, duke i akuzuar se janë dorëzuar ndaj presionit të mediave të njëanshme, grupimeve radikale dhe urrejtjes antisemite.

“Kur situata bëhet e vështirë, njerëzit e fortë veprojnë. Por shumë prej jush, kur u përballët me sfidën, u dorëzuat. Rezultati i kësaj është se Izraeli ka luftuar një luftë në shtatë fronte kundër barbarisë, ndërsa shumë nga vendet tuaja kanë zgjedhur të na kundërshtojnë,” tha ai, duke akuzuar disa shtete për embargim dhe “luftë politike e ligjore” ndaj Izraelit.