Këshilli i Lartë i Prokurorisë (KLP) ka caktuar datën 4 dhjetor 2025 si ditën kur katër kandidatët për postin e kryetarit të SPAK do të shpalosin platformën e tyre dhe do të japin intervistën përballë anëtarëve të KLP-së.
Kandidatët që do të paraqesin vizionin dhe strategjinë e tyre për drejtimin 3-vjeçar të SPAK janë: Adnand Xholi, Doloreza Musabelliu, Elvin Gokaj dhe Klodian Braho. Ata do të paraqiten në ambientet e KLP-së në orën 10:00, ku do të kenë mundësinë të prezantojnë vetveten, përvojën dhe planin e tyre të veprimit për institucionin.
Ky hap vjen pas kualifikimit të të gjitha kandidaturave si të vlefshme nga KLP, ndërsa gjatë muajit Nëntor po kryhen verifikime të detajuara mbi pastërtinë e figurës, integritetin profesional dhe organizativ, si dhe përshtatshmërinë e kandidatëve për të drejtuar SPAK.
KLP ka njoftuar se intervistat dhe prezantimet e kandidatëve do të jenë një moment vendimtar për të vlerësuar aftësitë profesionale, vizionin për zhvillimin e institucionit dhe angazhimin në luftën kundër krimit të organizuar dhe korrupsionit të nivelit të lartë.
Përzgjedhja e kryetarit të ri të SPAK vlerësohet si një nga proceset më të rëndësishme për funksionimin e sistemit të drejtësisë në Shqipëri, duke pasur parasysh rolin kyç të këtij institucioni në luftën kundër korrupsionit dhe krimit të organizuar.
