Avokati dhe ish-ministri i Drejtësisë, Ylli Manjani, ka bërë një reagim të fortë në rrjetet sociale, duke denoncuar përdorimin e të dhënave hetimore për shantazh ndaj gjyqtarëve në Shqipëri. Ai akuzon prokurorët e SPAK për përdorimin e materialeve të dosjes “Ergys Agasi” jashtë kontekstit ligjor, duke i detyruar gjyqtarët të marrin vendime kundër bindjes së tyre.

Në postimin e tij, Manjani e cilësoi këtë praktikë si një akt mafioz.

“Përdorimi për shantazh i të dhënave hetimore që janë siguruar në hetimet ndaj Ergys Agasit quhet krim. I organizuar madje në stil mafioz. Vendimet nën shantazh janë të padrejta. Shantazhuesi është kriminel i tipit mafioz. Kushdo që e bën ashtu quhet: mafioz,” shkruan ai në rrjetet sociale.

Ai thekson se, nëse është e vërtetë që me materialet e dosjes po shantazhohen gjyqtarë dhe prokurorë, akti është i rëndë dhe tipik mafioz, edhe kur e kryejnë vetë shtetarë të drejtësisë. Manjani nënvizon se shantazhi është shumë më i rëndë sesa çdo e ligë që mund të ketë bërë i shantazhuari dhe përgjegjësia bie te organi që administron materialet hetimore, pra SPAK.

“Nuk e di se ç’video, foto apo biseda telefonike ka SPAK në atë dosje, por përdorimi ligjor i tyre nënkupton vetëm atë proces dhe jo kundër kujtdo tjetër jashtë tij. Çdo përdorim tjetër quhet shantazh. Mafie quhet,” përfundon Manjani në postimin e tij.

Ditët e fundit, media kanë raportuar se një gjyqtar dyshohet të jetë shantazhuar me materiale intime dhe për këtë arsye ka ndryshuar vendimin në sallë, duke mos shprehur bindjen e tij të vërtetë.

Avokati i fton gjyqtarët dhe prokurorët që mund të përdorin shantazhin të dorëhiqen menjëherë, duke theksuar rëndësinë e ruajtjes së besueshmërisë dhe drejtësisë në sistemin gjyqësor.