Kreu i Partisë Demokratike, Sali Berisha, paralajmëroi se protesta e opozitës e planifikuar për këtë të shtunë do të jetë ndryshe nga tubimet e mëparshme, duke theksuar se lëvizja hyn në një fazë të re të veprimeve të saj.

Në një deklaratë për mediat, Berisha u shpreh se qytetarët presin protestën për të shprehur pakënaqësinë dhe revoltën ndaj qeverisë, ndërsa e cilësoi tubimin si një nga reagimet më të forta që, sipas tij, ka njohur vendi.

Ai theksoi se opozita do të kalojë në “fazën e diversifikimit të aksioneve dhe veprimtarive”, pa dhënë detaje konkrete mbi format e protestës, duke shtuar se publiku do të njoftohet në vijim në përputhje me vendimet që do të merren.

Sipas Berishës, protesta e së shtunës do të përfaqësojë, në vlerësimin e tij, “ditën e triumfit të opozitës dhe të qytetarëve”.