Shumica parlamentare nuk i miratoi ndryshim propozimet e ligjit për mbrojtje të konsumatorëve, me çka “E Majta” kërkonte të shfuqizohen deklaratat e ambalazheve dygjuhësore të produkteve. Propozimi mori mbështetje nga vetëm katër deputetë, e 22 ishin kundër.
Siç thonë nga “E Majta”, ky ligj është në kundërshtim me amendamentin e pestë të Kushtetutës, ndërsa gjithashtu u bëhet padrejtësi prodhuesve dhe kompanive, veçanërisht atyre të pjesës lindore.
“Në Gjevgjeli përshembull ka prodhime të cilat kanë etiketa, ambalazhe, deklarata, udhëzime, çertifikata e kështu me radhë në gjuhën maqedonase dhe në gjuhën shqipe. E ato produkte i blejnë maqedonasit, grekët, serbët, boshnjakë e hungarez. Shqiptarët nuk blejnë sepse nuk ka shqiptarë. Kështu, pronarëve të marketeve, shitoreve e tregtarëve u imponohet obligimi të bëjnë etiketa, deklarata e dokumente të tjera edhe në gjuhën shqipe”, tha Sashko Jançev – E Majta.
