Në seancën plenare të Kuvendit, kryetari i Partisë Demokratike, Sali Berisha ka përsëritur akuzat e tij ndaj qeverisë dhe kryeministrit Edi Rama, duke deklaruar se institucioni i Kuvendit po përdoret për të mbrojtur abuzime dhe interesa të caktuara.
Berisha u shpreh se Parlamenti është shndërruar në “mburojën më të turpshme në historinë e 35 viteve pluralizëm”, duke shtuar se sipas tij ai po përdoret për të mbrojtur “vjedhjet e Ramës dhe të klanit të tij qeveritar e familjar”.
Ai ngriti akuza edhe ndaj zv.kryeministres Belinda Balluku, duke deklaruar se Kuvendi nuk i hoqi imunitetin dhe duke e cilësuar si “notere e vjedhjeve”, ndërsa theksoi se ajo vazhdon të mbajë mandatin e saj.
Në fjalën e tij, Berisha iu referua gjithashtu edhe deputetes Olta Xhaçka, duke kujtuar vendime gjyqësore dhe qëndrime institucionale lidhur me mandatin e saj, si dhe duke pretenduar se çështje të caktuara po shtyhen në mënyrë të qëllimshme.
Ai kritikoi edhe mënyrën e zhvillimit të debateve parlamentare, duke thënë se interpelancat dhe diskutimet po vonohen dhe nuk respektohen afatet procedurale. Sipas tij, kjo ndodh për shkak të mungesës së vullnetit politik nga mazhoranca për të lejuar diskutime të plota në Kuvend.
Deklaratat e Berishës u shoqëruan me tone të forta dhe akuza të drejtpërdrejta ndaj qeverisë, ndërsa seanca vijoi mes debateve mes palëve politike.
