Policia e Tiranë ka njoftuar se nuk merr përsipër zhvillimin e tubimit të paralajmëruar nga Partia Demokratike e Shqipërisë, i cili pritet të mbahet sot (20 shkurt 2026), në orën 18:00, para Kryeministria e Shqipërisë.

Sipas njoftimit zyrtar, vendimi është marrë pas analizës së riskut dhe duke marrë në konsideratë incidentet në protestën e mëparshme, ku pati persona të maskuar që hodhën bomba molotov dhe mjete piroteknike, duke lënduar punonjës policie. Autoritetet thonë se disponojnë gjithashtu informacione se edhe protesta e sotme mund të shoqërohet me veprime të dhunshme.

Megjithatë, Policia thekson se ka ndërmarrë të gjitha masat në bazë të ligjit “Për tubimet”, për të garantuar rendin dhe sigurinë publike në rast se tubimi zhvillohet.

Bllokime të paralajmëruara të qarkullimit

Nga ora 15:00 deri në përfundim të tubimit do të bllokohet lëvizja e automjeteve në:

Bulevardin “Dëshmorët e Kombit”, nga kryqëzimi pranë Ministrisë së Brendshme deri te sheshi “Nënë Tereza”;

Rrugët “Ukraina e Lirë”, “Papa Gjon Pali II” dhe “Ismail Qemali”.

Policia paralajmëron se, në varësi të zhvillimit të situatës, kufizime mund të ketë edhe në akse të tjera rrugore, ndërsa qarkullimi do të devijohet në rrugë alternative për të ndihmuar qytetarët.

Në fund, Policia e Tiranës apelon që qytetarët të shmangin lëvizjen me automjete në zonat që do të bllokohen, të përdorin rrugë alternative dhe të distancohen apo të denoncojnë çdo veprim të dhunshëm apo paligjshmëri.