Nuredin Dumani, i njohur si një nga bashkëpunëtorët kryesorë të drejtësisë në Shqipëri, është shtruar sot me urgjencë në QSUT, pasi ka shfaqur probleme serioze me zemrën.

Burime pranë spitalit bëjnë me dije se gjendja e tij shëndetësore kërkoi ndërhyrje të menjëhershme, ndërsa autoritetet kanë marrë masa të rrepta sigurie gjatë transportit dhe qëndrimit të tij në spital.

Prokuroria e Posaçme Kundër Korrupsionit dhe Krimit të Organizuar (SPAK) po ndjek nga afër situatën, duke mbajtur kontakte të vazhdueshme me institucionet shëndetësore për të monitoruar gjendjen e Dumani.

Nuredin Dumani ka luajtur një rol kyç si bashkëpunëtor i drejtësisë, duke dhënë dëshmi që kanë ndihmuar në hetime mbi grupe kriminale të strukturuara dhe ngjarje të rënda kriminale në vend. Kontributi i tij ka qenë vendimtar në çmontimin e disa prej organizatave më të fuqishme kriminale.

Gjendja e tij shëndetësore vijon të monitorohet nga stafi mjekësor dhe SPAK, ndërsa çdo zhvillim i ri pritet të publikohet zyrtarisht.