Kryeministri Edi Rama ka reaguar sot pas interpretimeve të pasakta, sipas tij,  që lidhen me qëndrimin e tij ndaj Transmetuesit Publik Shqiptar (RTSH). Në një deklaratë të bërë publike, Rama i quajti këto interpretime “keqkuptime të shtrembëruara” dhe u bëri thirrje autorëve të tyre të lexojnë ose dëgjojnë me kujdes fjalimin e tij.

“Po bëhet një model për të ardhur keq i kësaj epoke të re të përtacisë së shfrenuar ndaj dëgjimit të asaj që të tjerët realisht thonë, që të përballemi me deklarata si kjo, të cilat pasqyrojnë një keqkuptim thellësisht të shtrembëruar të qëndrimit tim lidhur me RTSH”, tha Rama.

Ai theksoi se vërejtjet e tij nuk kanë të bëjnë me lidhjen e financimit apo ekzistencës së RTSH-së me miratimin politik, duke e cilësuar çdo interpretim të tillë si “të pasaktë dhe keqorientues”.

Kryeministri përfundoi deklaratën duke nënvizuar se mbrojtja e informacionit nis me mos përhapjen e dezinformatave, duke u bërë thirrje të gjithëve për kujdes në përhapjen e lajmeve dhe interpretimeve që nuk reflektojnë qëndrim të saktë.