Tensionet në Lindjen e Mesme po përshkallëzohen ndjeshëm, pasi Ushtria e Iranit paralajmëroi se do t’i japë një “mësim historik” Izraelit dhe Shteteve të Bashkuara, pas sulmeve të fundit ndaj qyteteve iraniane.
Deklarata erdhi nga gjeneral brigade Abolfazl Shekarchi, zëdhënësi i lartë i Forcave të Armatosura iraniane, i cili tha se çdo bazë në rajon që ndihmon Izraelin do të konsiderohet objektiv legjitim:
“Siç kemi deklaruar më parë, çdo bazë kudo në rajon që asiston Izraelin do të jetë objektiv i Republikës së Shenjtë Islamike dhe forcave tona të armatosura. Nuk do të tregojmë asnjë hezitim.”
Ngjarjet e fundit përfshijnë edhe një viktimë në Abu Dhabi, Emiratet e Bashkuara Arabe, pasi mbetjet e raketave të interceptuara ranë mbi një zonë banimi. Viktima është një shtetas aziatik, i goditur nga copëzat e raketave balistike që u rrëzuan nga sistemet e mbrojtjes ajrore. Ministria e Mbrojtjes e Emirateve e cilësoi sulmin si “një përshkallëzim të rrezikshëm dhe një akt frikacak”.
Në kuadër të ofensivës iraniane, një video e verifikuar nga CNN tregon momentin kur një raketë godet një bazë të Marinës amerikane në Bahreini. Një zyrtar amerikan konfirmoi se baza ishte objektiv i një sulmi me raketa nga Irani.
Situata mbetet tejet e tensionuar, me disa shtete të Gjirit që kanë aktivizuar sistemet e mbrojtjes ajrore për të përballuar valën e sulmeve, ndërsa frika për një përshkallëzim më të madh vijon të rritet.
