Kreu i grupit parlamentar të Partia Socialiste e Shqipërisë, Taulant Balla, ka komentuar mungesën e deputetes Elisa Spiropali në seancën plenare ku u votua për çështjen e imunitetit të Belinda Balluku.

I pyetur nga gazetarët nëse do të ketë një vendimmarrje për Spiropalin, Balla u shpreh se Partia Socialiste ndjek një praktikë të brendshme, ku në fund të çdo sesioni parlamentar bëhet një analizë e plotë e performancës së deputetëve.

Sipas tij, çdo vlerësim apo masë merret vetëm pasi përfundon kjo analizë dhe dorëzohet raporti përkatës.

“Ne kemi një rregull që në çdo fund sesioni bëjmë një analizë të performancës së çdo deputeti të PS, dhe kur të dorëzohet raporti, më pas kërkohet përmirësim pune apo çështje të tjera. Zonja Spiropali nuk ka shprehur shqetësim në mbledhje të grupit të PS”, u shpreh Balla.

Deklarata e tij vjen pas interesit mediatik mbi mungesën e Spiropalit në një nga votimet e rëndësishme në Kuvend, ndërsa deri më tani nuk është bërë e ditur nëse do të ketë masa konkrete lidhur me këtë rast.