Përshkallëzimi i ri i konfliktit mes Shteteve të Bashkuara dhe Iranit ka dhënë menjëherë efekt në tregjet ndërkombëtare të naftës. Çmimi i naftës bruto Brent kaloi sërish mbi 90 dollarë për fuçi, ndërsa investitorët druhen se përplasjet e reja mund të rrezikojnë furnizimet përmes Ngushticës së Hormuzit.
Çmimet u rritën në orët e para të së hënës, pasi forcat amerikane goditën dy lëshues raketash iranianë në ishullin Larak, pranë Ngushticës së Hormuzit. Sipas zyrtarëve amerikanë, objektivi ishte të parandalohej vendosja e minave detare në këtë rrugë strategjike të transportit.
Irani reagoi duke njoftuar sulme me raketa ndaj dy bazave amerikane në Jordani. Ushtria jordaneze tha se kishte interceptuar tetë raketa pasi ato hynë në hapësirën ajrore të vendit.
Pikërisht frika për një përshkallëzim të mëtejshëm dhe për ndërprerjen e qarkullimit të naftës në Ngushticën e Hormuzit ka ndikuar në rritjen e menjëhershme të çmimeve.
Brent u ngjit në rreth 90.3 dollarë për fuçi, ndërsa nafta amerikane WTI u tregtua mbi 85 dollarë. Tregjet po ndjekin me shqetësim situatën, pasi Ngushtica e Hormuzit është një nga korridoret më të rëndësishme energjetike në botë.
Çdo përshkallëzim i ri në këtë zonë mund të ketë pasoja edhe për konsumatorët, pasi një reduktim i furnizimeve ndërkombëtare do të ushtronte presion të mëtejshëm mbi çmimet e karburanteve.
Nafta shtrenjtohet edhe në Shqipëri
Rritja e çmimit në tregjet ndërkombëtare vjen në një moment kur nafta në Shqipëri është tashmë në nivele të larta.
Në Tiranë, çmimi i një litri naftë ka arritur në 219 lekë, nga 215 lekë më parë, ndërsa edhe në zona të tjera të vendit çmimet kanë kaluar nivelin e 215 lekëve për litër.
Shqipëria po përballet kështu me një situatë të dyfishtë: nga njëra anë çmimet e larta në tregun vendas, ndërsa nga ana tjetër pasiguria e krijuar në tregjet ndërkombëtare pas përshkallëzimit SHBA-Iran.
Nëse tensionet vazhdojnë dhe furnizimet përmes Hormuzit preken më tej, presioni mbi çmimin e naftës mund të rritet edhe më shumë në ditët në vijim.
