Mbledhja e Këshillit të Lartë të Prokurorisë është shtyrë këtë të premte, pasi anëtarët nuk kanë arritur të sigurojnë kuorumin e nevojshëm për zhvillimin e saj.
Sipas raportimit të gazetares Anila Hoxha, në këtë fazë KLP pritet të shqyrtojë edhe çështjen e zgjatjes së afatit për dorëzimin e formularëve të deklarimit të pasurisë së kandidatëve pranë ILDKPI-së.
Mungesa e kuorumit ka bërë që mbledhja të mos zhvillohet, ndërsa Këshilli vijon procedurat që lidhen me garën për Prokurorin e Përgjithshëm dhe dokumentacionin e kandidatëve.
Procesi është shoqëruar me vonesa, pasi formularët e vetëdeklarimit të pasurisë së pesë kandidatëve ende nuk i janë përcjellë ILDKPI-së për verifikim. Kjo ka ndikuar edhe në ecurinë e procedurës së kontrollit të pasurive.
Por përveç çështjeve administrative, gara për kreun e Prokurorisë së Përgjithshme është shoqëruar edhe me debate brenda vetë KLP-së.
Në mbledhjet e fundit janë paraqitur kërkesa të ndërsjella për përjashtim dhe dorëheqje të disa prej anëtarëve, në kuadër të procesit të përzgjedhjes së kandidatit që do t’i propozohet Kuvendit.
Situata ka ngritur pikëpyetje edhe mbi respektimin e afateve të përcaktuara për përfundimin e procesit.
Pas dështimit të mbledhjes për mungesë kuorumi, drejtimin e seancës e mori relatori i çështjes, Erind Gërmenji, i cili njoftoi se mbledhja do të zhvillohet në një datë tjetër.
Ndërkohë, mbetet për t’u parë nëse KLP do të arrijë të zgjidhë në mbledhjen e radhës çështjen e formularëve të pasurisë dhe të vijojë pa vonesa procedurën për zgjedhjen e Prokurorit të Përgjithshëm.
